Чурчагӏулакхий министра отчет: Россе эггара кӏезигагӏа зуламаш да Гӏалгӏайче

Опубликовано .

Паччахьалкхен ӏаьдала а моттигерча самоуправлене а органаша цхьана къахьега деза, вай республике юкъар-политически хьал талхаргдоацаш, аьлар Гӏалгӏай Республике гӏолларча Чурчагӏулакхий министра Кава Дмитирийс, Йовлой Заьлмаха тхьамадал а деш дӏайихьача Халкъа Гуллама заседане ше къамаьл деш. Заседане балха юкъе дакъа лоацаш бар республика правительства доакъашхой, низама а тӏахьожама а органий кулгалхой, федеральни структурай а муниципальниобразованей а викалаш. 

Кава Дмитрийс хоам бирд епутаташка Гӏалгӏай Республике гӏолларча Чурча гӏулакхий министерства юкъара лостам лорабеча 2017-ча шера баьча балхах, иштта цо дийцар моттигерча ӏаьдала органаша юкъара лостам лорабара а юкъара кхерамзле лораяра а аьнна шоашта хьахьожа даьча рузкъах шоаш даьр.

Цо белгал дир,Россе эггара кӏезигагӏаз уламаш Гӏалгӏайчен доазонтӏа долга кхыча субъекташка хьежача. 2017-ча шера 100 эзар сага дӏалаьрхӏача Гӏалгӏайче даь 334 зулам да. Российски Федераце юкъера хьокхам 1419 зуламба; Къулбаседа-Кавказа федеральни округе (СКФО) гӏоллара хьокхам 714 зулам ба. Министра яхачох, уж хьокхамаш вӏаштӏехьдаьннад Чурча гӏулакхий министерства баь болх бахьан долаш а,иштта цар шоай болх кхыча правоохранительни органашца а ӏаьдала органашца адага а бувлаш лелабар бахьан долаш а. Иштта тоалуш доагӏа республикера криминогенни хьал белгалдеш дола кхыдола хьокхамаш а.

Къаьстта дийцар новкъарча кхерамзленах, хӏана аьлча наькъашкара хьал чӏоагӏа кхераме а шийна теркам тӏабахийта безаш а да. Мел къахьеге а, республика наькъашкара хьал тоалуш дац, аварийность лохлуш яц. Авареш (ДТП) – 238 я (+22,1 %); байнараш – 84 саг ва(+7,7 %); лозаваьраш – 393саг ва(+29,3 %). Укхаза белгалде доагӏа бераши кагирхойи юкъе а болаш 37 авари хинналга, царех ворхӏ ондаргвенналга, 36 човнаш яь лозаваьлга. Вай республика уж чӏоагӏа кхераме цифраш я. Цу цифраша тешал дуновкъа лелара кхерамзле лораяр дукха кхоачам боацараш долашдолга.

Цунца цхьана новкъалелара правилаш (ПДД) толхаяра хьокхамаш лохденнад 67,1 %.

Ший къамаьл чакхдоаккхаш министра белгалдир, фотовидеофиксаце комплексаша беш бола болх беззача боараме хиларо авареш йира а цу аварешка нах бовра а хьокхамаш лохдергда аьнна догтийша ше волга. 

Парламента спикер волча Йовлой Заьлмаха баркал аьлар министра, шийна дӏа мел деннача хаттара цо чулоацам а болаш жоп даларах, моттигерча ӏаьдала органашца кхы а чоагӏагӏа бувзам лелабира тӏаахьийхар из.

Парламентареша хьакхайка мел яь предложенеш а рекомендацеш а чулоацаш Гӏалгӏай Республика Халкъа Гуллама Постановлени тӏаийцар.

Дӏахо заседане доакъашхой хьежар итт республиканскиз аконопроектагеи бӏаь гаргга йолча федеральни законийпроектагеи.

Пленарни заседани чакхйоалаш къамаьл дир Гӏалгӏай Республика Халкъа Гуллама кагирхой совета доакъашхоша Мартазанаькъан Хазбулатеи Дзахканаькъан Азаси. Цар дийцар Гӏалгӏайчен парламента хьалхара созыв хьахаржара Денах лаьцаи гӏалгӏай халкъ мехкахдаккхара Денах лаьцаи.

860A8180

Символика

Gerb Ingushetii