Республике дездеш да Гӏалгӏайчен Конституце ди

Опубликовано .

Республикански парламента Зӏамигача зале чакхъяьлар Гӏалгӏай Республика Халкъа Гуллама кховзткъеи иттлагӏа заседани. Цигача тхьамадал деш хиннача Йовлой Заьлмаха даькъалбийцар депутаташ парламента хьалхара созыв харжара, Гӏалгӏай Республика Президент харжара, республика Керттера закон – Гӏалгӏай Республика Конституци тӏаэцара 24 шу дизарца. Из ди дагалоацама ди да аьнна оттадаьд ший указаца Гӏалгӏай Мехкадас Евкуранаькъан Юнус-Бека.

Конституци тӏаэцарца дегӏаахара демократически новкъа яьлар Гӏалгӏай Республика. 1994-ча шера хиннача Хоржамий комиссе бакъдаь тӏаийцачох, конституце проекта кхадж тессар бахача нахах 90 % болчар. Парламента спикера белгалдир, цу дийнахьа хинналга ГӏалгӀай Республика Президента хоржамаш а, Гӏалгӏай Республика хьалхарча созыва Халкъа Гуллама – Парламента хоржамаш а. Цу хана денз алсаме къахьегаш хьайоагӏа вай парламент. Белгалдича бакъахьа да, Гӏалгӏай Республика ялхлагӏча созыва Халкъа Гуллама болх баьча цхьан шераи биъ беттаи 116 закони 1600-нел дукхагӏа постановлении тӏаийцалга, кхоачашдира ӏаьдала федеральни органий территориальни органаша баьча балха хьакъехьа цу органашка ладувгӏар юкъедаьккхалга, таханарча дийнахьа производственнии туристическии лостамаш а кхыйола сфераш а дегӏакхувлара чӏоаггӏа эшаш дола законаш тӏаийца даьнналга.

«Парламенто хьинаре къахьегаш хиларо торо лу социально-экономически дегӏаахара проблемаш яшха, къамашта юкъера машар а барт а чӏоагӏбе, вай керттера декхар кхоачашде – Гӏалгӏай Республиках ше ше кхоабаш йола а зиза теха беш мо хозалца тоаенна йола а Россе регион хьаяр», – аьнна белгалдир спикера.

Йовлой Заьлмаха ловца баьккхар депутаташта, ираз-аьттув хилба шун вахаре, толам хилба шун балха тӏа, оаш тӏаэцаш дола законаш наьха вахара хьал тоадеш хилда, аьнна.

1233211

3211113

Символика

Gerb Ingushetii