Евлой Заьлмаха: «Ишколаш йол-йолча увттаеш йола карташ берий кхерамзле 1алашъяра духьа деш дарий дакъа ларх1а доаг1а»

Опубликовано .

41212313

Ишколе даха арадаьнна бер увзадала дезаш дукха х1ама да новкъа. Х1аьта бер даь-наьна б1аргк1алара даьнна ха ч1оаг1а теркалъе ма езий. Дешара заведенешца дувзаданна, целевой програма д1адехар кхоачаш а деш, моллаг1а а йодаш-йоаг1аш йола х1амаш лелача наькъашца яда ишколаш а деша дахале бераш ухаш йола учрежденеш а технически средствашца 1алашъяра дахача шера даь дукха х1ама да вай мехка.

Х1анз укх сахьата Г1алг1айчен масса а йолча дешара заведенешка аьшка карташ, йовш-согаш сердал тела светодиодни светофораш оттаяь яьнний, кхыдола х1амаш даьд. Бакъда цхьайолча метте увттаяь карташ, богг1аш бола теркам т1абохташ увттаяьяц. Яндаре №2 йолча юкъерчадешара ишкола йихе иштта да из, масала. Карт-м оттаяьй, цхьабакъда ишкола 1от1абоаг1а г1ашхой никъ бисаб укхаза болх баьрий а меттигерча 1аьдала а терко йоацаш.

Бувцаш бола никъ ца хилар зийнад Г1алг1айчен Мехка Дас, Россе Президент хоржача дийнахьа ишколе вена нийсваннача. Парламента Спикера Евлой Заьлмахана, тахан ше юрта ваха нисвеннаволаш, уж кхоачамбоацараш теркалдейтад республика автодора кулгалхочунга Хаматханов Батырага, Наьсара района керте латтача Лотыров Исроапалага, нах бахача Яндаре керте латтача Падиев Исма1алага.

Парламента Председатела къаьстта терко йир, тротуара к1ийле ч1оаг1а ца хилар, йикъ-йикъе нийслуш дола к1оагаш, бетона б1оаг1ий, тайп-тайпара кхыдола х1амаш г1аш долха бераш а боккхаг1а бола нах а г1ашхой наькъ т1ара а бувлаш машенаш лелача наькъ т1а хьат1абувлийташ хилар. Цо аьлар: «Карташ-м берий кхерамзле 1алашъе еш ма йий вай, цхьабакъда тротуар ца хилча из кхерамзле 1алашъяр дизза хилац. Динза даргдоацаш х1ама да из». Спикера яхачох, е гуш дола цхьацца кхоачамбоацараш дер деш баьхкарий мелал бахьан да, ишкола директораш шоай хана шоай берий кхерамзленах йола йоакхо йизза яь ца хилар бахьан а да.

Лоаццача юкъа кхоачамбоацараш ц1ендаь д1адохаргда аьнна д1ат1аийцад региона наькъа предприяте кулгалхочо. Цо дувцачох, тротуараш ца хилча ца йола меттигаш белгалъяь а я, цига дер де болабу болх кхы хьем боаццаш болалургболаш а ба. Масала, Яндаре керда тротуар а машенаш сеца остановкаш а хургйолаш я шин дешара учрежденена йихе (№1, №4 йола ишколаш). 

Паламента Спикера къаьстта теркалду, деша даг1ача берий кхерамзле 1алашъяра ерригача республика дешара учрежденеш чуйолча г1ишлошта йихе наькъашца карташ хилар мел лоарх1аме да. Евлой Заьлмахана хаддаш аьннар дар: «Боккъонца бехктокхаме х1ама да из. Цудухьа укхаза дер, вай лораде г1ертараш бераш долга а ховш, дизза а лертт1а а ца дича даргдац». 

1231232134

54231231231312

Символика

Gerb Ingushetii