Г1алг1ачен Правительвас янний 2017 шера баьча балхах йола отчет

Опубликовано .

143758689

Йовлой Заьлмаханага хьалхале а йолаш Г1алг1айчен Республика Халкъа Гуллама ткъаи кхойттлаг1а заседани чакхъянний.
Г1алг1айчен Республика Мехка Дас дакъа лаьцад Г1алг1айчен Республика Правительства 2017 шера баьча балхах отчет луш Правительства Председатела Гаьгенаькъан Руслана къамаьл даьча Парламента заседане.
Парламентарешта хьалха къамаьл деш Правительства Председатела теркалдир: «Шийх отчет луш дола 2017 шу Г1алг1айчен Республика 25 шу далар дездеш йолча хьалхаленца д1адахар. Цу денна хетаяь тайп-тайпара культура а спорта а мероприятеш хилар, социальни а производственни а объекташ хьайийлар. Дукха хьаьший хилар вай республике баьхка, Г1алг1ачене хинна дикаг1ча оаг1арахьара дола доккхий хувцамаш царна шоашта б1арга а дайра».
Йисте йоалачахьа яьнна я боханза ца боалаш беха лела нах, токхамаш хиннача даькът1ара нах, харцара кхерам болаш долча ц1еношкара нах шо-шоай фусамашца 1алашбира проблема, аьлар премьер-министра.
Цул сов дешара дикал а дешара организацеш беча белхаца дар наха гарга дар а айденнад. Гаьгенаькъан Руслана белгалдир белха овсарала а дикаг1ча оаг1орахьа хулаш долча хувцамий а тешал деш дола тарахьаш долаш хилар, укхаза бола керттера хьокхам гражданий вахара дикал аййалари хьал-торон уж совбалари дале а: «Унахц1енон материально-технически хьал дег1адоаладира духьа 10 шера республике хьаяьй 25 объект, 2017 шера хьайийла перинатальни центр а республикански берий больница а мо йола йоккхий объекташ а йолаш». Масса йола нах бахача моттигашкара фельдешерско-акушерски пункташ а лорий амбулатореш а шоаш баь болх беш хилар совнаг1а, Т1ой юрта, Долакха юрта, Экажкъонгий юрта, Хьуле, Аке-Юрта, Г1ейрбика-Юрта, Зязиков-Юрта, Йоаккхача Ачалке, Галашка царна лаьрх1а кхы а 9 керда г1ишло яьй.
Тахан долаш дола республика сурт-сибат, премьер-министра яхачох, кхыметтел итт шу хьалха хинначоа юхе а дикка хувцаданнад.
Вай дукхаг1дола бераш берий бешамашка аха йиш йолаш дацар, дикка яр кхаь сменах болх беш хинна школаш а, школаш шоаш стандартий боарамашца йоаг1аш а яцар. Тайп-тайпара йоккхий спортивни а культурни а мероприятеш д1акхахьа эша а бахача наха доагг1аш дола медицински г1о де эша а материальни база йоацаш яр.
Дукхаг1ча даькъе цу дувцаш дарий хьаькъе де дезаш дараш хьадаьд, тайп-тайпара 500 сов объект д1айолаялийтай республике укх итт шера, иштта д1айолуча д1акхаьча яраш а дукха я», - аьлар Гаьгенаькъан Руслана. Таханарча дийнахь, премьер-министра яхачох, республике 123 школа я, царех 53 организаци шоаш деш дар цхьан сменах беча белхаца деш йолаш я, шин сменаг1а – 70 школа. Кхаь сменах болх беш йола школаш республике яц, цхьабакъда 2018 шера сентябрь бетта цхьацца йола школаш кхаь сменах болх бе яла езаш хилар кхерам болаш да. 10 шера республике керда хьаьяраш а юхатояьраш а 51 школа я, 6 эзар меттиг йола 8 школа чакхъянний духхьал 2017 шера керда хьаяь.
Доклада яхачох, унахц1ено тоаяра духьа шерра-шера д1акхохьача кампанех 2017 шера дакъа лаьцараш 22 эзар бер да. Т1аккха укхаза къаьстта теркал де а деза, сала1ара юкъе хинна бераш 2016 шера хиннача боарамах к1езигаг1а ца хинналга, хьалхаг1а 135 миллион сом хинна федеральни бюджетера йола финансировани хинна еце а.
Гаьгенаькъан Руслана аьлар, бюджетни средстваш даха деззача д1адахийтара оттаяь г1ожа контроль я аьнна. 2016 шераца нийс а деш аьлча хьалххе белгалдаьча г1улакхашта бюджетни средстваш ухаш ца хилара х1ама 2017 шера 90,6 процент к1езигданнад. Карарча шера керттера а де дезарий дола наькъаш, премьер-министра яхачох, биззача боарамах бюджета социальни декхараш кхоачашдир, бюджетни сферацарча цхьацца йолча болхлой категорий Россе Федераце Президента указаш д1адехар кхоачаш а деш къахьегамах луш бола мах айбир.
Доклад йистеяьнначул т1ехьаг1а депутаташ Мехка Даьга а Республика Правительства Председателага а цхьацца шоашта къувла х1амаш хийттар. Хаттараш тайп-тайпара дар: критиках мишта фу хет, дер ц1ендеш ярий хьал миштад, ДТП къезигъяра фу де деза, Г1алг1айчен лоамен культура т1ехьлен объекташ 1алашъяра хьаькъе, муниципальни образованеш дег1аахара дечун хьаькъе, цу юкъе къаьстта а города Сунжа хьакъе дечох, и. кх. д1.
«Диъ шу-м аз дувца а дувцац, криминогенни хьал низкъала хилара бахьан, шеддарг дита а дита х1ана дахкац аьнна, экстремизмаца а терроризмаца а вай къувсаш даьхка. Цу т1ехьа денача ялх шера экономика реальни секторе, социальни сфере вай нонаг1а толамаш даьхад. Дукха объекташ я яь. Дотационни йолча субъекташта юкъе вай даьр даьд ала йиш йолаш цхьа субъект яц», - аьлар Евкуров Юнас-Бика
Заседани йистейоалача кхаьчача Парламента Председатела Йовлой Заьлмаха укх т1еххьарча шерашка республике доккхий дика хувцамаш хиннад аьлар. «Керттера дар, терроризм а экстремизм а соцаяьй вай. Иштта долча хьал т1а ялх шера социально-экономически дег1ахар дика долаш хьайоаг1а республика. Из шеддар хьахилар ше хила ма еззар йолча республика Мехка Даь хьалхаленца а да».
Парламента а Правительства а юкъаралах оалача Йовлой Заьлмаха теркал дир уж шиъ шоаш къаьст-къаьста йола доала ткъоврош яле а, хьалхашка латта декхараш ца1аш хиларах – ка етташ а йоацаш республика дег1ахар, баха нах хьал-торон совбувлар, уж доккха декхараш кхоачашдеча доала масса а маьже шоайла айхха бувзам а болаш цхьана хила езалга.
Укх дувцача деша хьаькъе парламента постановлени т1аийцар.
Отчета анализ яьчул т1ехьаг1а депутаташ кечдаь мехка х1ама социально-экономически дег1ахарах дола шоашта хетараш республика Мехка Даьга д1адохьийтаргда.

23232321212

335457811221

4467587609672211

Символика

Gerb Ingushetii