ГIалгIай Республика Халкъа Гулламо ду Кхайкарал

Опубликовано .

Халкъ политически репресех балане оттадаь Ди хиларца дувзаденна йола мероприятеш дIаяхьарца

ГIалгIай Республика  Халкъа  Гулламо ду Кхайкарал

Массейтта шу да вай мехка 30 октябре цIай дезду ди лоархIаш доаца – из да балан ди – репрессеш лелаяь ди.

ХIара шахьаре, юрта, вай боккхача мехка бехк боацаш шоай нах боабаьча наьха тIехьенаша дIакхухь из Дагалоацама ди.

Из Ди дагадохаш, вай мехка дIаяхача бIашерерча исторе оагIонга   хьежача, вай ГIалгIай  Мехка дагабох дукха цIий Iомохкадаьча къаман нах хинна ца Iеш, гурахьа 1992 шера Iазап тIакхаьчараш а. Ворх шу хьалха 30 октябре ший амарца Ю.Б.Евкуровс, ГIалгIай Республика  Мехкдас белгалдир цхьаннахьа вай республике доггIоздаккхара йола мероприятеш а иштта  передачаш а дIакхухьаргйоацаш.

Гурахьа 1992 шера бехк боацаш, къиза боабаьча наьха дагалоацама йолча  Мемориала доазон тIа 2013 шера денз дукха адам вIашагIкхеташ йола акцеш дIакхухь. 25 шу хьалха хиннача цу халача деношта хетаяьча мероприяте, шоай мел дола гIулакх а дите, дакъалоац зIамигачо а воккхачо а, ламазаш ду, байнарашта маьл кхайкабу, иштта политически репрессен балане эйттараша цу юкъе дагалоац.                 

Цу тайпара  мероприятеш хIара шера дIакхахьар боккха лоархIам болаш да, вай  халкъа исторен оагIонашка хьажача  харцдар,  нийсдар кхетадайтара,  хиннар диц ца далийтара.

Цхьабакъда, чIоагIа хала а хет, ха дIаяхарца, вайна юкъерча цхьацца болча наха уж денош дицдеш латташ хилар, мероприятешка башха дакъа лаца сагота ца хилар, селханар дар диц а денна, кхоаненга кхача гIерташ хилар, вай даьша-ноаноша политически репрессех эза хинна  Iазап диц а деш. Вай дицдалийта йиш яц дагалоацама Ди.

Цецваллал ийрча гIулакх дар 30 октябре  д1а дахача шера вай  мехка дукха саг йодаш-йоагIаш моттигаш  нийсъялар, самукъадоаккхаш йола  телевидене гIолла гойташ передачаш яр. Бакъда, вахар дIахо додаш да, хIаьта вай вIаштIехьадеций  кхыйола ха оттае цу  сакъердама?

Халкъа Гуллама депутаташ мехкахошка кхайкарал ду 30 октябре кхы хIанзчул тIехьагIа цу тайпара йола мероприятеш дIа ца кхахьара. Нагахьа санна вайна юкъера эхь-эздел дейнадеце, гIулакх юкъера даьннадеце, вай декхар да исторе балане оагIонаш йиц ца яр, уж дагайоагIаш хилар.

Шо кхетаргда аьнна хетт тхона!    

Bjz7mzr

Символика

Gerb Ingushetii