2018-ча шера шахматех ловзара Парламента кубок Новрбенаькъан Ахьмадага я

Опубликовано .

Гӏалгӏайчен Парламента Кубок къувсаш хиннача шахматни турнира итогаш вӏашкайоалайир Халкъа Гулламе.

Турнире котбаьннараштеи призераштеи грамоташи совгӏаташи делар. Февраль бетта 24-25-чеи деношка «Ади-Ахмад» спортивни клубе чакхъяьннача турнире дакъалоацаш хиннача 70 сага юкъе бар 10-11 шу даьннараш а ветеранаш а. Призовой моттигаш яьхай аьнна белгалвир 7 саг. Эггара дикагӏа толам баьккхар ветерана Оздой Мухьмада, хӏаьта пхелагӏа моттиг – Гадаборшанаькъан Хаматхана. Дӏадахача шера котваьннача Дебзиев Джабраила йиълагӏа моттиг яьккхар.

Кхоалагӏа моттиг Осменаькъан Ӏаьлийга я, шоллагӏа моттиг – Гӏалгӏайчен шахматий Федерацен вице-президент волча Гадаборшанаькъан Тимурага.

Эггара боккхагӏа толам баьккхар Новрбенаькъан Ахьмада – цунна дӏахьожайир хьалхара моттиги Парламента Кубоки. Белгалве воагӏа Йовлой Амир а, берашта юкъе дикагӏбола толам баьккха. Амира цхьайтта шу мара даьннадац, цхьабакъда, шахматисташа яхачох, из гаьнавала мегаш ва. Цунна Халкъа Гуллама грамота а елар, шахматех дола литература а делар.

Йовлой Заьлмаха дег-тӏара даькъалбийцар турнира беррига доакъашхой. Цо белгалдир из турнир 1994-ча шера февраль бетта хьалхарча созыва Парламент харжара хетаяь йолга.

«Оаха чӏоагӏа раьза а долаш хьаллоац из ловзар Гӏалгӏай мехка дегӏаахар. Дог-гӏоздоаккхаш хӏама да ер яхьаш лакхарча боарам тӏа дӏакхухьаш хилар а укхаза дакъалоацаш сел дика шахматисташ хилар а. Шахматаша хьаькъал алсамдоаккх, къаьстта бера хьаькъал. Со дог-тийша ва, укх шахматни турнира доакъашхой хӏара шера дукхагӏа хургхиларах, ер ловзар наха юкъе дӏадаржаргхиларах», – аьлар парламента спикера.

Йовлой Заьлмаха яхачох, вай республике спорт дегӏаахар алсамдаьннад Гӏалгӏай Мехкада волча Евкурнаькъан Юнус-Бека цу гӏулакха теркам беш хилар бахьан долаш. Вай республике тахан йолаш я шиъ шан дворец, дегӏаухаш я вай хоккейни командаш.

Гӏалгӏайчен шахматий Федерацен вице-президент волча Гадаборшанаькъан Тимура белгалдир укх шера дакъалоацаш хиннараш чӏоагӏа шахматисташ болга, гроссмейстераш дика кийчбенналга. Шахматий Федераце цӏерагӏа баркал аьлар цо Парламента кулгалхошта турнир дика вӏаштӏехьъяккхарах. Цу тайпарча турнираша аьттув лу из спорт наха юкъе дӏайоаржае, шахматаш наха дӏайовзийта.

Парламента Кубок яккхара турнир укх шера кхозлагӏа чакхъяьлар.

Парламента Председатель волча Йовлой Заьлмахеи Гӏалгӏайчен шахматий Федерацен президент волча, Европан 2016 шера чемпион волча Инаркъанаькъан Эрнестои дӏадахача шера лаьрхӏад из турнир хӏара шера хилийта а республикански яхьий календара из юкъеяхьа а.

1232444322

11111111132111

13131321111

13133211

133211

Символика

Gerb Ingushetii