Унахцӏено лораяра хьакъехьарча комитета заседани

Опубликовано .

Халача инфекцеша хьахьедеча лазараша дегӏа деш дола зе юхатоха дика аьттув лучарех я иммунизаци. Из дийцар Белхарой Яхьяс тхьамадал а деш хиннача Халкъа Гуллама унахцӏено лораяреи социальни политикеи хьакъехьарча комитета шеръяьча заседане. Цу заседане дакъалоацаш бар Гӏалгӏай Республика унахцӏено лораяра министр йола ӏарапханаькъан Марем, республика керттера эпидемиолог йола Тӏумхой Мариэтта, Роспотребнадзора Гӏалгӏай Республике гӏолларча Управлене Кулгалхочун заместитель йола Цӏолой Майя, дувцача дешаца хьаштдола кхыбараш.

Ше къамаьл деш Ӏарапханаькъан Марема дӏакхайкайир заседане доакъашхошка 2017-ча шера иммунитет чӏоагӏъеш профилактически прививкаш ярах йола информаци. Цул совгӏа, цо дийцар эпидемиологически хьал тоадеш а наха профилактически прививкаш яра болх шербеш а шоаш Роспотребнадзора Гӏалгӏай Республике гӏолларча Управленеца цхьана беча балхах. Инфекционни лазараш юхатохара хьакъехьарча цхьана еча мероприятей план а тӏачӏоагӏъяьй, – аьнна белгалдир министра. Ӏарапханаькъан Марема яхачох, профилактически прививкаш е нах раьза ца хилара бахьанаш тахкар духьа вӏаштӏехьъяьккхай информационно-пропагандистски кампани: газеташкеи, радиои, телевиденеи, интернетеи гӏолла а, нахаца шоашца къамаьлаш деш а.
«Профилактически прививкай Къаман календарага хьежжа мероприятеш чакхъяхара духьа эца еза иммунобиологически препараташ, 23 миллион сомах. 2018-ча шера цу гӏулакха хьакъоастаде лерхӏ 9 миллион сом гаргга ахча. Эшача ахчаца дистача из 39 % мара дац», – аьлар министра.
Ший аргӏагӏа, Цӏолой Майяс белгалдир, республика доазон тӏа укх тӏеххьарча массехк шера цхьаццадола инфекционни лазараш лелалга, иммунитет чӏоагӏяра йола прививкаш йирца соцаде йиш йолаш дола. Уж профилактически прививкаш йоаггӏача тайпара йира медицински учрежденешка хила еза цу гӏулакха эшаш мел йола медикаменташ, – аьлар цо.
Депутаташа тӏахьийхар Гӏалгӏай Республика унахцӏено лораяра министерства болхлой инфекционни лазараш даржара духьалара прививкаш йира болх алсамбаккхара, таханарча законо дӏадеххача тайпара.
Белхарой Яхьяс аьлар, вакцинаци йиро соцаду лазараш наха юкъе даржар, аьнна.

3232222111

32321131312321

321312313331

32132131313111

Символика

Gerb Ingushetii