Российски Федераце Президента хоржамаш боаггӏача боараме чакхдаьлар

Опубликовано .

Укх деношка хиннача Парламента Совета заседане Халкъа Гуллама Председатель волча Йовлой Заьлмаха белгалдир Российски Федераце Президента хоржамаш вай республике дика вӏаштӏехьдаьхаи цхьаккха толхам боацаши чакхдаьнналга. «Тахан вай мехка хьалхашка къаьстта чоалхане декхараш латт. Уж кхоачашдира вайна эш денал дола чӏоагӏа саг, дуккхача къамех латташ долча российски халкъа цхьоагӏо лораергйолаш вола, ше хьа мел дер бокъонаца дустаргдолаш вола. Март бетта 18-ча дийнахьа российски халкъо ший хоржам бир, кхадж тессар Россе Президент хила тоам болаш волча кандидата – Путин Владимира», – аьлар Парламента спикера.

Россе Президента хоржамаш чакхдаларца гулбеннараш даькъал а бийца, Гӏалгӏайче хоржамаш вӏалла инцидент йоацаш чакхдаларах хоам бир Йовлой Заьлмаха. Хоржамий хьакъехьара бокъо толхаяьй, аьнна, Избиркоме цхьаккха заявлени хьачуцаенаяц, аьлар цо. Дӏахо цо белгалдир, хоржамий кампани йолаш Российски Федераце Президент хила лерхӏача кандидатех цхьанне а бокъонаш телха ца яьлга, хоржамаш берригача мехка маьрша, бокъонаца доаггӏача тайпара, дийла долаш хинналга.
Вайцига хоржамаш чакхдоахача дакъалоацаш ши эзар совггӏа саг вар хоржамий комиссей доакъашхой, тайп-тайпарча кандидаташкара а политически партешкара а тӏахьожамхой бар 3 бӏаь совггӏа саг, иштта республикански а моттигера а ӏаьдала болхлой.
Республика избиркома даннешка хьежача гуш да, эггара дукхагӏа кхадж Путин Владимира тессалга – 149 эзари 488 саго (уж 83,17 % хул). Шоллагӏа моттиг Грудинин Павелга я (11,79 %), кхоалагӏча моттиге – Жириновский Владимир ва (5,66 %). Явлинский Григорий йиълагӏча моттиге ва (2,37 %), хӏаьта Собчак Ксения – пхелагӏча моттиге я (1,65 %).
Кхыча кандидаташта тессаа кхадж цхьан процентал кӏезигагӏа ба.
Дӏахо заседане дийцар хьатӏайоагӏача аргӏанара йоацача Халкъа Гуллама ден повестке юкъедаха хаттараш. Царца дар Лоаман Гӏалгӏайчен культурни тӏехьален объекташ малагӏча хьале я а, уж лораяра законодательство телхадар дӏадаккхара хьакъехьа деш фуд а яха дош.
Из дош республика бахархошта боккха лоархӏам болаш хиларца а наха дагадоаллаш хиларца а дувзаденна дар цу деша тӏахьожам лелабеча комитета хьалхашка Йовлой Заьлмаха оттадаь декхар: март бетта 22-ча дийнахьа Гӏалгӏай Республика Халкъа Гуллама заседаней зале цу деша хьакъехьа хургйолча слушанешка дакъалаца беха беррига цу дешаца хьашт мел дар.
Республика Парламента заседанешка хьажа йиш я Интернете уж заседанеш йолхача хана.

 132131231332

1231233232222

Символика

Gerb Ingushetii