Дуккха нах хулаш йолча меттигий кхерамзле дикаг1а 1алашъе еза

Опубликовано .

Дуккха нах хулаш йолча меттигий кхерамзле дикаг1а 1алашъе еза

Х1ара к1ира хулаш йола Халкъа Гуллама Совета заседани даехьай Парламента Председатела Йовлой Заьлмаха.
Парламента арг1анарча заседане повестка юкъе яхача законопроекташка а законопроектий инициативашка а хьажарах бола хоам бир Совета доакъашхош.
«Российски Федераци административни правонарушенех долча Кодекса юкъе хувцамаш дахьарах йолча» федеральни закона проектага хьажар парламентареш.
Законопроекта д1адехар, суда пирстопа-исполнитела д1адехар кхоачаш ца дарах, нагахь санна цу тайпа х1ама наьха унахц1енон а вахара а кхерам т1атессаш дале, административни та1азар ч1оаг1дир да.
Таханарча дийнахь декхар доаллаш волчунга де дезар кхоачашдейта е де ца дезар ца деш из соцаве г1ертача суда пирстопа деш дар дикка д1аьха да аьлар, Парламента Совета заседане къамаьл даьча Горчханаькъан Мувсас
Исполнительни производство д1айолаеш декхар доаллаш волчо декхар ший ло1амах кхоачашдергдолаш ха юлл пирстопа. Нагахь санна ц1енхаштта бахьан доацаш йиллача хана цо ше де декхар вар хьа ца дой, пирстопа исполнительни сбор хьайоаккхийла аьнна постановлени язъю дер кхоачашдира керда ха а юллаш. Цу юкъа а де дезар хьадинза дусе, суда пирстопа декхар доаллаш волчо ший де дезар хьадергдолаш административни правонарушенех йола протокол оттаю, юха а ха юллаш, т1атехар Горчханаькъан Мувсас.
Из процедура кхоачашъяь яьлча мара пирстопа бокъо яц декхар доаллаш вар дакъа а воацаш, нагахь цун дакъа хиланза даргдоацарех деце, даьр даь воаккхар де волале.
«Административни а хьаштдале уголовни а бехктокхаме саг вугаш дола Российски Федераце законодательства х1анз укх сахьата оттадаьраш декхар доаллаш вар исполнительни документа шийгара д1адехар дукха де г1ертаргвола хьал оттадерех дац» - белгалдир паччахьалкхен лоаттама а законодательства а комитета председатела Горчханаькъан Мувсас.
Теркалде деза, Кемерова городе «Зимняя вишня» яхача ТРК хиннача ц1ияларх, Г1алг1айчен Республика Мехка Даь распоряжене д1адехар кхоачаш а деш Г1Р г1олла йолча Россе МЧС ГУ йол-йолча д1а а ухаш планах боаца болх д1абехьад ц1и ялар кхерам бол-болча бизнеса объекташка а кхычахьа а.
Иштта 2018 шера 27 марта денз 30 апрела кхаччалца йолча юкъа Г1алг1айчен Республика даькъ т1а ме йолча таьрга-сакъердама а, културно-зрелищни а, цхьана дуккха нах хулача меттигий кхыча объекташка а ц1ера кхерамзле 1алашъяра д1адехар кхоачашдеш планах йоаца проверкаш кеч а яь д1ачакхяьхай. Еррига а хьожаш теркалъяраш цхьана дуккха а нах гулалуш йола 93 объект я.
Г1Р г1олла йолча Россе МЧС ГУ беча хоамах 53 объекте 6 000 сомагара 15 000 сомага кхаччалца г1од тохар могадеча РФ АП Кодекса 20 ст. 1 д. бокъонах административни материалаш оттаяьй, 18 объектана предупреждени яьй, цар дер соцадергдолаш де дезар хьадолда аьнна прокуратура суде искови заявленеш яхьийтай.
Ала доаг1а, болаш бола низ т1абахьарах кхерамзле боккъала а йолаш йолча объекташка болх бира х1ама соцалуш ца хилар. Цу х1аманца цхьацца йолча меттигашка наьха унахц1енон а вахара а кхерам тувсаш дола хьал ч1оаг1а отта йиш хулийташ да, нах бовра кхерам тувсаш дола хьал отийташ да.
Цу тайпа дола зулам шоашкара доалийташ бола нах 200 эзар сомагара 500 эзар сомага кхаччалца г1од тоха оттадирца оза лерх1. Юридически лицо а йоацаш шоай болх беча предпринимателашта, нагахь санна укх законопроектах закон хуле, 500 эзар сомагара 800 эзар сомага кхаччалца г1од тохарца оза йиш хургъя е 90 ден-бийсанга кхаччалца дер де йиш йоацаш уж сецабе йиш хургъя. Юридически лицашта цхьан миллионагара кхаь миллионага кхаччалца дола г1од детта доладала йиш хургъя. Уж а 90 ден-бийсанга кхаччалца дер де йиш йоацаш сецабе йиш хургъя т1аккха.
Горчханаькъан Мувсас къаьстта теркалдир, дер де йиш а йоацаш соцаваь декхар шийх хьарчавар испонительни документаш д1адехар кхоачашде г1ертаргва, финансови-хозяйственни болх бе йиш а йоацаш ше виса хилар бахьан, цкъа дале, шозлаг1а дале гражданашта зе хила дола х1амаш юха а тох цу тайпа дочо.

123321222

2123233113

Символика

Gerb Ingushetii