Ханна боккхаг1болча гражданий регионашкара льготаш шоаш йолчча юсаргъя кхы т1ехьа а

Опубликовано .

860A1443

Пенсионерашта йола регионашкара льготаш шоаш йолчча юсаш хилар могаду Г1алг1айчен Парламента

(Пенсе баха ха йолча гражданий льготаш шоаш йолчча йисар дувца закона проект кхаьчай Парламенте).

Йовлой Заьлмаха председателал а деш ялхлаг1ча созыва Г1алг1айчен Республика Халкъа Гуллама Совета езткъеи барх1лаг1а заседани хилар тахан.

Цул хьалха республика Мехка Дас ханна боккхаг1болча гражданий духьа региональни законодательства корректировка е аьнна закона проект яйтаяр Парламенте. Россе Президента Путина Владимира инициатива кхоачаш а еш пенсе баха д1агарга кхаьчача гражданий льготаш шоаш йолчча йитар дувц цу законопроекта т1а.

Ала деза, президента Путина Владимира гражданашка яьча телеобращенеца пенсионни законодательстве де яха хувцамаш к1аьддеш долча ялх х1амах ца1 долга е региональни льготаш шоаш йолчча йита яхар.

Къаьстта оале, дувцар, нагахь санна пенсионни законодательство хувцалой а пенсе бахара ха аййой а, 55 шерага кхаьчача кхалнаьха а 60 шерага кхаьчача ма1анаьха а льготаш а бетт-бетта ийду ахча а хувца ма лолда яхалга да.

Йовлой Заьлмаха цу х1аман духьа е еза законодательни база ший ханна хьайойла аьнна профильни комитета д1ат1адиллар, региона лаг1а т1а вер социальни 1алашвира льготаш шоаш йолчча юсаргйолаш.  

«Републикански бюджетера финасировани йола льготаш, аййег1ерта пенсе бахара ха аййой а, шоаш йолчча йиса еза,- белгалдир цо. – Региональни льготаш а кхыдоа кхалнах хьаллоацаш дар а кхалнаха 55 шу даьлча доаг1аш хилар оттаде деза, ма1анаха - 60 шу даьлча. Е ювцараш водаш-воаг1аш наькъа лур-дутар долча, ЖКХ доаг1ар луча лур-дутар долча, лаьттан налог луча, воахала налог луча йола льготаш я».  

Спикера яхачох, хила дезаш дола массане а юкъара пенсе бахара ха айлуча юкъе ханна боккхаг1а болча гражданий социальни хьал эша ца далийтар да Президента ший кхайкарарал т1а РФ субъекта хьалха латтарашкара д1адехар.

Цу хьаькъе ювцаш йолча законопроектага Г1алг1айчен Парламента цхьан заседане хьажа лаьрх1ад.

Цул т1ехьа Парламента арг1анарча заседане повестка юкъе яхача кхыча законопроекташка хьажарах дола хоамаш дир Совета доакъашхош.

 

Символика

Gerb Ingushetii