Г1алг1ай Республика Халкъа Гуллама депутаташа дакъа лаьцар вай мохк Россех д1акхийтта 250 шу дизара ц1ай дездеча

Опубликовано .

Тахан Г1алг1ай Мехка лоарх1аме в1ашаг1кхетар д1адихьар – Г1алг1айче Россех д1акхийтта 250 шу дизара ц1ай дездеш.

1770 шера г1алг1ай къаман викалаша исторически лоарх1аме соцам т1аийцар, дукха къамаш дахача дезале хила, Россена тешаме хиларах дув биар Онгушта уллуврча «Барта Босе» оалача шаьрача моттиге.

Из г1улакх г1алг1ай къаман вахаре исторически лоарх1амерча белгалон куц хинна эттар.

Ц1ай дездара керттера белгалонаш хилар К1уре-Юртарча Дьякова ц1ераг1ча стадионе. В1ашаг1кхетар хьадийллар Россе Т1ема-фецара низий «Мерцхилгаш» («Стрижи») ц1и йолча авиационни тоабано, чоалхане, терко т1аозаш г1етта леларца. МиГ-29 ц1и йола ворх1 миха кемано, чоалханера пилотажа куцаш гойташ. «Мерцхилгаш» («Стрижи») ц1и йолча авиационни тоабан командира Осяйкин Сергейс шоай говзал гойтар чакхдоалаш, кеман кабина чура лоарх1амеча ц1айца даькъала бийцар в1ашаг1кхетара доакъашхой. Авиашоу ший тайпара премьера хилар: дунен чу ц1ихеза йола Мерцхилгаш» («Стрижи») тоаба ц1аккха а Г1алг1ай Мехка хиннаяц хьалхаг1а.

Д1ахо доакъашхой теркамга яр театрализованни представлени, цунца ши б1аь ахб1аь шу хьалха мел хинна Г1алг1айчен вахара керттера белгалонаш гойтар.

Паччахьалкхен ансамблаш «Г1алг1айче», «Магас», берий хореографически ансамбль «Лийг» а яр шоай керда гойтамаш довзийташ, х1аьта Г1алг1ай Мехкарча дошлоша ширача заман Магас йоаккхаш хинна т1ема сурт гойтар.

Республикански театрий артисташа спектакле а пластически этюдашка а хоза хьахьекхар къаман вахара оаг1онаш.

Республика бахархой юбилейца даькъала бувца хьаяьхка итташ делегацеш яр.

Официальни даькъе къамаьлаш дир лерх1амерча хьаьшаша, РФ Президента Къулбаседкъа - Кавказски федеральни округе г1олларча полномочни викала заместитела Стариков Сергейс, Федераце Совета председатела заместитела Умаханов Ильяса. Цар 1ойийшар Российской Федераце Президента В.В. Путина а Федераце Совета Председатела В. И. Матвиенко а даькъала бувцара телеграммаш. Даькъала бувцара дешашка белгалдаьккхар Г1алг1айче Россех д1акхийтача денз 250 шу дизар, г1алг1ай къаман вахаре йоккха моттиг д1алоацаш, российски паччахьалкхе ч1оаг1ъеча лоарх1аме долга.

«Г1алг1ай Республика – РФ эггара къоанаг1а йола субъект я, цхьабакъда цун вахара кхел, укх ши б1аь шовзткъеи итт шера, хадаргйоацаш, айхха ювзаенна я Россеца. Ший ло1амах Россе паччахьалкхенах д1акхийттача хана денз г1алг1ай къам дукха къамаш дахача вай даьхен, дерригача халкъашца цхьана, атта боацача, сийле йолча, вахар кердадоахача новкъа хьадоаг1а. Республика бахархоша шоай т1ема а къахьегама а хьинарца даьйче тоаеча, хозъеча г1о-новкъостал даьд. Тахан шоай б1аьшерений 1адаташ лорадеш, культурни т1ехьале совйоаккхача къахьегаш, цар доккха дакъа лоац халкъа юкъара декхараш кхоачашдеча. Дог тийша ях аз, республика бахархошта шоай лаьтта дезаро царна кхы д1ахо йодача хана а новкъостал дергда, цар д1а мел доладаьча дикача балхашка. Машар хилба, вахара таро ма эшийла, дика мел дар хилда. Ц1ай даькъала хилда!», – яхаш белгалду Матвиенко Валентинас.

Ше къамаьл деш,  Келаматнаькъан Махьмуд-1аьлас белгалдир, регионе аьттув ба мотт, дикаг1дола 1адаташ лораде, дег1адоаладе, шоай лаьттан йоакхо е, дог тийшша де лерх1араш белгалде.

"Республике хьалъеш ишколаш, больницаш, берингаш, культурни центраш, болх беш воай университет я. Ерригаш х1ана яц аьнна нах баха пункташ, цу даькъе лоамашкара яраш а газ чуйилла я. Вай къаман вахара хьалаш тоаде лаьрх1а дукха да кхоачашде дезараш. Вай массанеца а цхьана лайнаб т1ема бала, иштта толамаш дахара г1озал а кхаьчай вайга", - аьлар Келаматнаькъан Махьмуд-1аьлас.

Цул т1ехьаг1а хилар доккха ц1ай дездара концерт. Цига шоай говзал йовзийтар российски эстрада ц1ихезача артисташа: РФ Халкъа артистка а Гуржий-Мехка Халкъа артистка йолча Гвердцители Тамарас, РФ заслуженни артистка а Г1Р Халкъа артистка йолча Йоанданаькъан Тамарас, РФ а Г1Р а заслуженни артист волча Лепс Григоре, «Оаз. Бераш» ц1и йолча конкурса финалист хиннача Ханиева Рагдас, ерригроссийски а дуненхалкъашта юкъерча а вокальни конкурсашка дуккхаза Гран-при яьхача Анкудинова Дианас, «Оаз» яхача музыкальни шоу шоллаг1ча сезоне котало яьккхача  Волчков Сергейс, иштта Къулбаседкъа Кавказа бовзаш болча артисташа.

Торжественни мероприяти чакхъяьлар доккха ц1айна хетадаь шат1лак даларца.

86527578578578

2757857575

375757575

Символика

Ingushetia Med